Sjus trök vaan un hierlikke vekansie. Geer wèt wel: 12 daog Fraankriek. Hiel sjoen weer, lekker temperetuur, lekker ete, lekker drinke en väöl kilometers maake. En dat neet allein. Veer waore in de Vogezen gewees. Prachtige netuur, sjoen weeg, flinke bóchte, stijl hellinge boe iech zellefs miene HD veur in den ierste gaank mòs zette. Dus al mèt al, allein mèr geneete.

Mèh noe weer trök nao 2 oktober. Veer hadde nog altied vekansie. Die leep naomelik pas 4 oktober aof. Nein, veer waore spesjaol ieder trök gekomme um op dizzen daag uzze jaorlikse Run&Fun daag gereje en geviert woort. Veer netuurllik vol mèt verhaole en geweend aon sjoen weer en sjoen weeg, lekker ete en lekker drinke.

Weer trök nao d'n 2e oktober. 's Mörregels wakker weure en gein zon. Bis ste gek, ut regende! Ok. Ut is neet aanders. Ontbijte mèt, en dat veel ech tege, gein stekbroed mèr weer mien crackers. Gelökkig had iech wel nog get franse kies mètgebrach.
Veur ut iers in weke, de regekleijer mètgenome. Irene had ze toes al aongedoon. Iech nog neet. Now jeh, de motors gestart, zonder regen op weeg naor Bung. Dao aongekome zaog iech dat d'n oproop vaan Raymond veur unne bessemwagel, neet veur niks waor gewees. Dao stoond miech toch Marc met unne aonhenger . Chapeau!
Obbins veel ut met bakke oet de loch. Iech ouch mer de regenbrook aangedoon. Tot groete hillariteit had iech daor nogal get meujte mèt. De vrowluij voonte ut wel biezunder. En ze leete miech mer kloete.

Eindelik veerdig, en dao ginge veer. Geer snap wel, oondertusse waor ut weer druug. Dus dat geklungel mèt die brook waor dus veur de bok zien huive gewees. Och jeh, hadde die vrowluij tenminste get te lache.

Iech mot zegge dat d'n toer dee veer veurgeschoteld krege door Raymond en Elvera en Arthur en Els, of waor ut noe door Raymond en Elvera en waore Arthur mer Els veur de trök reis? Iech weet ut niet mie zo good. De veurinformatie waor nogal verwarrend en vendaog snapde iech ut al hielemaol neet mie. Ut waor oeteindelik gein frans systeem mie. Nein,  iech waor ut aanders geweend.

U lekker tuurke, dat miech weer u paar nuij dinger leet zien. Unne nuije boch bij Maasband, un nuij brök, un nuij have en u modelvleegveld dat door ut Maosproject waor weggegraove.

Veer kwaome bijj un sjoen meule aon, boe veer get lekkers  zowwe kriege. Ocherrem, stoont miech Raymond dao in de kaw. Nein dat begrepe veer allemaol. Dat hadde zie zoe neet geregeld. Raymond had ut daan ouch met zien veurzitters kwaliteite metein geregeld en hadde veer ut metein allemaol lekker (te) werrem (wat un zeikers toch). Lekkere koffie, lekker ete, un sjoen Meule en sjoen weer. Ut deeg miech good dat ouch Paul en Roos debijj waore. U good teike. Good geregeld Niek en Bertien! Meinigein vaan us klom in de meule en leet ziech dao ein insjöd de door de behierders vaan die meule. Geer wèt noe in eeder geval boe ut woord oliedom vaanaof kump.

Naodat veer allemaal genòg gedroonke, gegete en gesch..... hadde, ginge veer weer op us motorkes en neet zoals d'n oetbater vaan de meule dach, op brommerkes, riechting Bung Wie kump heer toch debei!

De rit die volgde waors prima. Sjus twie dinger. Iech weet noe nog neet wee de rit gemaak heet. Dee Belsj en dee oet Bung maake ut gewoen spannend en volgens miech doen ze mèr get. Dat bleek wel weer oet ut volgend veurval. Op dreikwaart stoonte veer opins aon de kant. De "leader of de gang"  stoont miech obbins zoonder bezien. Ut is toch neet te geluive! Unne aandere, geer raojt ut dat waors ouch geine Mestreechteneer, goong spontaan even tenke bijj un pómpstation. Al mèt al ongeveer 20 minuute paus. Dat waor netuurlik niks. Mèh door dat gedoe zaote veer netuurlik sjus nog in de rege veurdat veer bij ut eindpunt waore. Bedaank hiere!

Ut eindpunt. Geer wet wel. Bij " de jongens" in Bung. Waore ze miech dao binnen  toch aon ut vreigele euver de stukke vlaoj. Esof ze dao neet genòg höbbe stoon. Meh de slokkers höbbe ut geweete. Veer hadde röstig gewag en de aandere laote veurgoon. En die lachde allein mer toen ze hoorte dat de vlaoj die veer wowwe, op waor. Meh zoe es geer wet, veer zien ouch neet veur ein look te vaange. Röstig aofgewag, röstig gevraog of ze us die vlaoj toch neet koste bedeene en jao huur. Veer krege met einige vertraging, u stök vlaoj boe de aandere allein mèr sjeloes vaan woorte. En veer mer lache.

Na väöl gewawwel en geawhoor, woort daan de finale ingezat. Eidereen stoon op en trok ziech de kleijer weer aon. Wee waor weer ut ierste boete?  Sjus:  uzze Jan. Heer waor al rundjes aon ut rijje umdat heer nog op Ria mos wachte. Allein wee woort naat? Sjus Jan. Veer neet. Veer höbbe nog effe gewach en zien lekker druug toes gekomme.

Meh noe effe alle gekheid op u stekske. Organisatie, bedaank veur unne perfecte en hiel gezėlige daag. Ut waor fijn uuch allemaol weer te zien en veur us waor ut un sjoen aofsleting van de vekansie. Hoewel, noe mos iech de motors ech goon potse terwijl iech in de Vogezen allein mer stöb hoofde weg te blooze. Ut is neet erreg. Ut waor ech unne leuke daag en de rekening vaan ut pòtse kreig geer nog wel.

Bert en Irene